Douar Alre, Gouel bemdez 2017 Un disoc'h a-feson

Douar Alre, Gouel bemdez  2017: Un disoc'h a-feson !

        Da geñver an tolp aozet nevez 'zo get Ti Douar Alre, e Pleuwigner, eh eus bet roet digarez da  akterion (kevredigezhioù, tier-kêr, mediaouegoù...) rouedad ti ar vro da zistreiñ àr goulzad 2017 ar festival Douar Alre, Gouel Bemdez (etre an 6 a viz ar Gouel-Mikel hag ar 24 a viz Du tremenet) ha da eskemm enta àr o ferzh en 13vet koulzad-mañ.

Degouezhioù liessort dre ar vro a-bezh

     214 degouezh, emgav foran pe abadenn, setu ar pezh a zo bet dalc'het an taol-mañ : baleadennoù ha troiadoù dizoloiñ ar c'hornad, predegennoù, abadennoù leurennet, diskouezadegoù, koñkour foto... Danvez é tegouezh doc'h pep sort publik kinniget er pevar c'horn ag ar gumuniezh kumunioù. Ur c'hinnig ken stank ha ken liessort a drugarez da liessortegezh, da niver ha da lañs ar 95 aktour o deus kemeret perzh.

Kresk enta a-fed niver an abadennoù dalc'het. Kement-se a zoug testoni ag al lusk hag ag ar c'hoant gober a santer dre ar vro àr an dachenn sevenadurel ; ul lusk hag ur c'hoant kevredet e rouedad TDA evit sevel ha kas ur festival a vlez da vlez. Peadra da vamiñ Katell Peron, kenurzhierez nevez en emgavet e ti ar vro: «Dizoloet em eus un nerzh, ul lusk da ober asampl na oan ket engortoz anezhe. Pemp sizhuniad festival, get kement à draoù àr gement a gumunioù, hag e-pad ur prantad n'eo ket hini an douristed : dreist!»

  Bec'h atav,  a vlez da vlez

       A-fed an dasson bet hag ar berzh graet e-mesk an dud, ma oa bet damsantet abaoe penn kentañ ar prantad ne vehe ket bet fall an disoc'h doc'h an tu-se, ar fotoioù bet diskouezet e-pad an emvod hag ar sifroù bet kreizennet en diskouez biskoazh splannoc'h : tud a zo bet hed-ha-hed d'ar pemp sizhunvezh, muioc'h eget àrlene zoken . 32.000 arvestour, setu ar pezh a zo bet embannet an devezh-all ; kement-se hep kontiñ - un dra gwall ziaes d'ober - an dud tremenet dre diskouezadegoù 'zo evel, da skouer, en hini bet kenaozet get TDA hag AQTA ha bet dalc'het ur miz pad e Alre 'O, er poull-neuial.

             Davet festival 2018

           Petra 'vo Douar Alre Gouel Bemdez 2018 ? Un tammig abred eo evit el lâret : e Mezheven da zonet hepken eo e vo goulennet get izili ar rouedad emezeliñ e roll ar festival mar faoto dezhe. Doc'h tu Ti Douar Alre, kenurzhiour ha bannour ar gouel, emeur neoah kroget dija d'en em soñjal. Adkempennet e vo traoù 'zo ; ar c'halander en linenn, da skouer, evit ma vo aesoc'h da bep ezel banniñ e-unan e abadennoù àr lec'hienn ti ar vro. Roet e vo ivez muioc'h a lec'h d'an emglevioù etre ti ar vro hag ar c'hevredigezhioù evit sevel abadennoù...

Ti Douar Alre a vo, e 2018 evel bepred, un aktour evitañ e-unan : kinnig a ray abadennoù savet dezhañ evel ma ra dalberzh. E-mesk anezhe e vo, a-dra-sur «Nerzh ar Gerlenn – La Force du Rond », an heuliad sonerezh, kan ha dañs douget get rann ar sonerezh hengounel