Devezh-studi e brezhoneg, e Kerplouz, d'ar sadorn 5 a viz Ebrel 2014

An eil gwezh eo da dTi Douar Alre ha da gKerlenn Sten Kidna kinnig un devezh-studi e brezhoneg, ha kement-se get harp izili a skol-veur Roazhon 2, Brest ha kani kreisteiz Breizh. Ar blez-mañ 'oa bet lakaet Daniel Doujet, mestr-prezegenner anezhañ e skol-veur Roazhon 2, da brezidant an devezh-studi. Un abadenn bet kinniget da geñver Sizhunvezh ar brezhoneg e Bro an Alre an hini eo hag an tem bet choajet - « Dour ha douar » - a oa daet d'ur feson anat diàr douaroniezh Breizh, n'eus ket met soñjal en diforc'h 'vez graet etre an Arvor hag an Argoad, oc'hpenn d'an dra-se emañ ret lâret eo un tem a gouch mat doc'h Bro an Alre hec'h-unan. C'hwec'h prezegennour – kelennerion, enklaskerion, tud é tonet a skolioù-meur – o deus pledet àrnañ. Pep hini anezhe en deus graet d'e soñj. Lod o deus tostaet doc'h an tem dre al lennegezh, é kemer harp àr oberenn Youenn Drezen (an dour an-dro d'an inizi) pe àr kani Loeiz Herrieu (Kammdro an Ankou) peotramant c'hoazh àr an haikuioù, lod arall 'zo aet kentoc'h davet an derminologiezh hag ar rannyezhoniezh. Un tregont den bennak 'zo daet da selaou doc'hte. Troet eo bet ar prezegennoù àr ar prim evit an nann-vrezhonegerion : a-drugarez da tokarnioù prestet dezhe e c'hellent heuliiñ an traoù.

Setu enta roll ar prezegennoù bet kinniget :

- Stefan Moal, « Dourioù ha douaroù, karantez ha karantez-vro e-barzh An Dour en-dro d’an Inizi gant Youenn Drezen .

- David ar Rouz, « Enklaskoù àr ar yezh dre ditourerion : skouerioù en Arvor hag en Argoad »

- Fanny Chauffin, « An dour hag an haiku : un digarez da grouiñ e brezhoneg »

- Daniel Carré, « Dour ha douar e Kammdro an Ankoù, karned brezel Loeiz Herrieu »

- Pierre-Yves Kersulec, « Pesketaerezh en dour dous » ;

- Serge le Bozec, « Brezhoneg ar mor klevet e Pleheneg ».