Emvod meur Sonerion Bro Gwened, sadorn 22 a viz Ebrel 2016

Sonerion Bro Gwened, bodadeg sonerion ar Mor-Bihan, ezel e Ti Douar Alre baoe 2 vlez, o deus dalc'het o emvod meur en Tanin, e Pleuwigner. Mar bez dalc'het an emvod blez ur sulvezh a viz Ebrel d'al liesañ, o deus kavet gwell pennoù Sonerion 56 kinnig en em gavet d'ar sadorn 22 a viz Ebrel abalamour da lod tud bout tapet an deiz goude – devezh ar votadeg - get kargoù en o c'humunioù.

15 bagad, diàr an 21 a re ar Mor-Bihan, o doa kaset kannad d'an emvod. Gete en em gave ivez an It. Le Meur, eil-maerez Gregam e karg ag ar skolioù, an Ao. Youenn Le Ret, bez-prezidant Sonerion Breizh, ar gengevredigezh vamm, hag an It. Le Dortz, sekretourez Bagad Gregam, ar bagad nevez ganet e Gregam

Da gentañ eo bet danevellet get Irène Tricaud, ar Breizdantez, an obererezh a-hed ar blezad tremenet ; savet eo bet lec'h hag ober ar gelennerion a-fet treuzkas glad sonerezh Breizh hengounel, kenkoulz evel gred Gildas Rio, ar c'henurzhier bet anvet e miz Gouere 2016, hag hini izili ar c'huzul meriñ. En ur reiñ da ouiet he c'hoant rein he dilez goude an emvod-meur, he deus c'hoazh ar brezidantez taolet ur sell àr-dreñv àr he zri blezad karg ; ur prantad na vo ket, hervez an holl, ankouaet en tazoù get izili ar gevredigezh.

Goude bout klevet an holl danevelloù (obererezh, yalc'h) eo bet goulennet get Gildas Rio displeg raktres pedadgogel Sonerion 6 evit 2017 ; degemeret eo bet a unvouezh. Ar skient bet prenet get hor gelenenrion en ur zaremprediñ ar skolioù e Gregam (skolioù kentañ derez ha skolaj Sant-Jozep) a ziskouez meur a hent da vonet gete evit diorren hor c'hinnig a-fet stummadur. En em dreiñ davet bed ar skolioù a zo a bouez bras mar venner kizidikaat ar re yaouankañ doc'h ar sonerezh dre vras ; ha doc'h hor glad sonerezh Breizh dreist pep tra. Evel-se ivez e vo sachet tud davet hor bagadoù sonerion. Setu perak eo bet displeget an tres dirak ar vodadenn veur ha kinniget d'an dud en degemer ; ar pezh a zo bet graet get an holl. Hent kevredigezh Sonerion ar Mor-Bihan en em gav enta merchet mat ha skler evit an amzer dazonet.