Kenavo, Douar Alre Gouel Bemdez 2016 !...

Setu klozet enta 12^vet prantad Douar Alre, Gouel Bemdez. Re abred eo c'hoazh evit teurel ur sell munut àr an disochoù. Ne seblant ket deomp neoazh bout bet forzh dishañval doc'h ar re kent : abadennoù kentoc'h darempredet mat ; ar santimant bout santet un tamm buhez é verviñ dre Zouar Alre a-bezh. Ni, kenaozerion, hor boa en em gemeret evit ma vehe bet, da vihanañ, un degouezh bennak e pep kumun ; an dud, an arvesterion o deus, int ivez, en em ziblaset dre ar c'hornad. 'Vel kent, eh omp bet, ar wezh-mañ c'hoazh, e stad da ginnig abadennoù liesseurt dre an danvez, an dud gortozet, al lec'hioù hag an eurioù lakaet.

Lec'h ar brudiñ n'eo ket bet, sklaer eo, dister e-barzh an disoc'h-se gounidet deomp. "Douar Alre, Gouel Bemdez" a zo daet da vout ur gwir merk. Ni, e Ti Douar Alre, hon eus graet hor gwellañ evit kreskaat he brud : ur skritell nevez, ul levrig-programm, ar c’halander àr Internet, emgavioù get ar gazetennerion, daremprediñ ar mediaoù klewelet...). C'hwi, mignoned vat, a zo bet niverus ec'h ober mañsion anezhi en ur vrudiñ an abadennoù savet genoc'h. En em lakaat holl dindan ar mem merk-se hag en diskouez, aze emañ just a-walch hon nerzh hag hor volontez da zerc'hel d'ober.

A gement-se - hag a draoù arall - e komzimp arre e-ser ar bilañs a rimp asampl a-benn al lun 5 a viz Kerzu, da 6^e30 g.m. er sinema Ti Hanok, en Alre. Gellet a rit merkiñ an emgav-se dija en ho karned. Digarez hor bo ivez da zizoloiñ, an deiz-se memp, ar film bet kensavet, etre an 16 hag an 29 a viz ar Gouel-Mikel, get ar gevredigezh 100Lieux ha Ti Douar Alre diàr an abadennoù, an dud, al lec'hioù bet darempredet get ar skipailh filmiñ.

D. Carré,

prezidant Ti Douar Alre