Connexion
FR | BR
Brudin dre +
7 Ebrel 2014

tro-vale anvioù-lec'h ha natur d'an 30/04/2014

Aozet e oa an darvoud get Kerlenn Skidna diàr intrudu Kumun Brec’h ha Ti Douar Alre. Ur 25 bennak a dud a oa prest da vonet da vale d’ar sul 30 a viz Meurzh, e Brec’h, e-tal Prad ar Vartired. E-mesk an dud-se ne oa ket kalz hag a gomprene brezhoneg trawalc’h evit heuliiñ mat an displegadennoù roet get Patrick Drean. Neoazh e oa bet kinniget dezhe gober pep tra e brezhoneg ur sort, hag o lakaat da glevet an droidigezh e galleg get sikour ar valizennad get 20 tokarn bet prenet n’eus ket forzh gwerso get Kerlenn Sten Kidna àr-un-dro get Ti Douar Alre. Get sikour ar voestad-se, hag èl rezon, get labour ar jubennour David ar Rouz hag a droe a-vuzul, er mikro hag a gase ar son d’an tokarnioù. Diskouezet o doa an dud bout kontant gellet klevet èl-se son ar brezhoneg, ar pezh a zo e-kreiz palioù sizhuniad ar brezhoneg, ma oa ar valeadenn unan ag an abadennoù enni.El-se e oa bet goulennoù savet a-hed an hent, e brezhoneg pe e galleg. Ma oar an animatour meur a dra, ne oar ket pep tra ha talvoudus-bras e oa klevet an dud é lâret ar pezh a ouiont pe é lakaat an animatour da resisaat e gaoz get o goulennoù.

Pleustret e oa bet àr daou dra dreist-holl e-pad an droiad : doc’h un tu, anvioù ar parkeier hervez ar c’hadastr kozh, ar pezh a dalvont e brezhoneg (pa vez gouiet) hag ar cheñchamantoù evit degouezhout get ar pezh a welomp bremañ. E Rostevel da skouer e oa interesant gwelet dre ar c’hadastr roudoù ag ar feson ma veze aozet ar labour-douar tro-ha-tro d’an tier.

Doc’h an tu arall e veze sellet spis doc’h an natur tro-ha-tro. E-mesk ar c’havadennoù : sonerezh get ar pimpoch pe get ar pis-toutou (pe c’hervizon), ar freskon (torch ha revr getoñ !), buhez an torrig-kenaou pe ar pennig-glaou er brinkier, broñs ar faou, an oulm-gwenn (pe onn), bleuñv ar spern-du, implijoù liessort ar skav… hag ur blantenn souezhus he zres, ha souezhusoc’h c’hoazh an implij graet anezhi : ar sendegri pe jilegre.

Aet e oa ar valeerion get an hent a grap betek Rostevel, ha goude o doa troet a-zehoù a-hed an hent-houarn da gavout « kroaz Herve » bet savet e koun « emgann an Alre », kent monet get an devalenn betek Toullbazhadoù en-dro. Goude tost teir euriad bale e oa plijadur àr fasoù an dud. Ha diskouezet e oa bet e vez moaien d’ober get ar valizennad àr an hentoù ivez, hep diaezamant, ha pas hepken en ur sal.