Un abadenn « Mardi de la Dañs » dibar a-walc'h hag un arvest àr ar stern : « Nerzh ar Gerlenn »

D'ar meurzh 27 a viz Even e oa daet hogozik 500 a dud e bourc'h Brec'h evit dañsal, kanal, soniñ, c'hoari, sellet doc'h ar re arall é korolliñ, debriñ krampouezh, tenniñ fotoioù, filmiñ ha c'hoazh...

Pep hani a zalc'ho soñj ag an nozvezh dibar-mañ evit un abeg pe un arall. Evit lod e vo a-gaoz d'an niver bras a dud daet, dre ma oa bet bourrapl dibuniñ an nozvezh ha kaer an dañsoù-tro. Evit lod arall e vo marse evit bout kemeret perzh en ul labour àr ober, ur film hag a viro ur roudenn ag ar glad dañset. Tud arall c'hoazh a soñjo kentoc'h er prantad fromus « Dalc'h soñj », pa oa bet klevet kleier Iliz Sant Andrev é soniñ 9 zaol da nav eur noz...

André Arhuero en doa souetet ma vehe bet brav an amzer ha ma vehe daet lan a dud. Un taol kaer e oa rak tud ha heol a oa d'an deiz-se ! Ur gemenadenn a gaso emberr evit trugarekaat razh re o deus respontet d'e bedadenn.

« Kouviet em boa d'an nozvezh-mañ kement dañsour a zo e Bro An Alre evit leurenniñ unan ag an taolennoù niverus a yay d'ober danvez hon arvest « Nerzh ar gerlenn ». Un arvest hag a vo kinniget e miz Mae 2018 ».

En arvest-mañ e vo lakaet an dañsoù-tro àr-wel e pep keñver : e keñver o stumm, o lusk, o signifiañs, o abegoù sokial... Istor an dañsoù-pobl a vo e neudenn dezhañ. E Breizh-Izel e weler pegen boutin eo bet an dañsoù-tro a-hed an amzer. Boiajet e vo ag ur c'hours d'un arall adal ar grennamzer betek an amzer a-vremañ, é tremen dre an Azginivelezh, ar prantad barok, klasel, romantel ha modern. Get ur c'hantad bennak a arzourion a Vro An Alre e vo lakaet an taolennoù-mañ da veviñ.

Douget eo ar raktres arz-mañ get Ti Douar Alre, ha dreist pep tra get e Greizenn Sonerezh Hengounel, get he frezidantez Nicole Raud ha get Fabrice Lothodé, renour ar skol sonerezh.

« Henoazh emañ bet boulc'het an traoù, get berzh. Sellet e vo doc'h an traoù filmet get dron Adrien Fréville ha savet 'vo diàr an dafar-se ur film a bado un dek munutenn bennak. Skrivet e vo un ton get Fabrice Lothodé hag a yay da heul ar film pa vo bannet àr ur skramm bras tra ma vo an dañserion é korolliñ. »

Da heul an arvest-mañ e vo kinniget d'an dañserion ur stummadur àr ar foñs kozh get Naïk Raviart, enklaskerez hag istorourez an dañs, arbennigourez àr dañsoù an 18vet kantved ha kendiazezourez Atalier an Dañsoù-Pobl a zo e bal dezhañ kas enklaskoù àr an dañsoù-pobl hag o c'helenn d'an dud. »

Evit gouiet hiroc'h a-ziàr an abadennoù kinniget get Ti Douar Alre àr www.tidouaralre.com
Monet e darempred :
Poduiñ ha skigniñ arvest « Nerzh ar Gerlenn – La force du rond »
André Arhuéro, kenurzhier Ti Douar Alre, degemer@tidouaralre.com
06 58 97 15 93 pe 06 03 40 66 36