Un hentenn nevez evit deskiñ fonnapl ar brezhoneg en Alre

Da heul un enklask kaset da benn get skolidi he c’hentelioù-noz e kinnig skipailh Kerlenn Sten Kidna ur mod nevez da zeskiñ : an hentenn d’an daoulamm (2 gentel bep sizhun) evit an deraouidi, àr daou vlez. Digoret e vo en distro skol 2016 e sal ar gevredigezh en Alre hag an arc'hantaouiñ CPF pe gant an implijet a zo posupl.

Get ar c’hentelioù-noz kustum e tesk an dud àr o gwarigoù, 1 euriad 30 bep sizhun. Goude un nebeudig mizioù, pe blezioù, e koll kalon lod ag an deskerion, dre ma ne zeskont ket fonnapl a-walc’h. An dra-se zo kaoz e c’hell un hentenn d’an daoulamm (2 gentel 1 euriad 30) kouchiñ gwell, evit an holl re a faot dezhe monet get muioc’h a zifrae. Ar soubidigezh a zo unan ag an traoù pouezusañ evit donet da benn a zeskiñ ur yezh, neuze e kinnig ar stummadur d'an daoulamm meur a staj dre soubidigezh (un devezh evit al lodenn vrasañ pe ur sizhuniad e-pad an hañv). He fal a zo lakaat ar gomañserion da gomz fonnapl e brezhoneg evit tapout al live B1 portfolio europa ar yezhoù.

E-mesk ar c’hoshañ skolioù-noz e Breizh emañ Kerlenn Sten Kidna. Efedus eo ar bedagogiezh pleustret get ar gevredigezh rak diazezet eo àr ar blijadur da zeskiñ, ha leuskel a ra ur lec’h bras d’ar gomz. Kemer a ra harp àr benveger a bep sort : c’hoarioù, divizoù e meur a zegouezh, atalieroù, lec’h-labour niverel… Hag evit mont pelloc'h get ar brezhoneg e sav Kerlenn Sten Kidna obererezhioù hag abadennoù a-hed ar blez ivez (baleadennoù, kaozeadennoù, gweladennoù...). Embann a ra traoù da lenn ha da selaou ivez (kelaouenn zivyezhek An Dasson, DVD àr ar c’hompren dre glevet...).

Evit gouiet pelloc'h

Lec'hienn internet : www.ksk.bzh / Pellgomz : 02 97 29 16 58 / Postel : ksk@ksk.bzh