Connexion
FR | BR
Brudin dre +
3 Mezheven 2020

Ti Douar Alre a lâr kenavo… d'an embac'h !

Ti Douar Alre a lâr kenavo… d'an embac'h !

         Daou viziad hanter hon eus ranket andur !... Daou viziad hanter forc'het a vezañs an dud, a hantiñ ar re all ! Da vihanañ, pelloc'h evit hor re nesañ dalc'het er memp bac'h geneomp ! Ar yec'hed da gentañ, netra da lâret.

      Neoazh, nag un dra drol evit ur gevredigezh sort get hon hini-ni he fal diazez dezhi lakaat àr wel, skiniiñ ha ranniñ ar vuhez sevenadurel vreton àr dachenn ur vro ! Na dic'hortoz ur stad bout parraet a zaremprediñ pa vêr just a-walc'h aze evit bout e-mesk an dud, evit luskiñ an ober asampl ! Penaos e vehe bet deomp chom a-sav hag ag un deiz d'an all ? ... Setu, dre ma oamp forc'het ag an darempred gwirion hon eus en em droet davet an darempred … en linenn !

     Bemdez enta eo daet un dra bennak nevez da binvidikaat holl lec'hienn; danvez da lenn, da selaou, da welet. A-drugarez da c'hred ha da ampartiz pare an ti, gopridi ha tud a volontez vat, eh omp daet a-benn da lakaat en linenn un 90 pennad bennak savet a-ratozh : yezh, koroll, kan, sonerezh, kontadennoù, tostaad d'ar c'hembraeg… Abadennoù berr àr demoù resis lakaet en linenn, bannet àr ar rouedadoù sokial; danvez liesseurt; danvez en deus plijet - sur omp a gement-se - er vro du-mañ ha pelloc'h zoken… Stad an traoù ganet diàr ar c'hleñved-red eo en deus hor rediet da vonet get an hent nevez-se. Brasik - ha bravik ! - eo an disoc'h; ken bravik ma karahemp derc'hel getañ, zoken ma rankimp bremañ monet difonnoc'h getañ, rak goar a vanko deomp, aes eo kompren.

      TI DOUAR ALRE A LÂR KENAVO… D'AN EMBAC'H !... Setu daet arre - ha mal e oa ! - an amzer d'en em gavet en-dro en un doare gwirion, da ginnig dor zigor d'an dud (lun-gwener; etre 9e30- 5e gm), da genlabourat get ar rouedad (kevredigezhioù, kumunioù), da soñjal er pezh a vo savet an hañv-mañ ("Tañvaomp ar vro !") hag er pezh a vo danvez 16vet tennad "Douar Alre, gouel Bemdez" (taol-lañs d'ar sadorn 26 a Wennholon)… Ya, met ne vo ket moaian "gober 'vel a-raok" !... Nann, kazi sur ne vo ket. CHOM HEP OBER ne rimp ket koulskoude.

       

D. Carré, président de TDA

3.06.2020

 

Ti Douar Alre se déconfine ! Interview réalisée par Radio Bro Gwened

Ti Douar Alre, che digor an ti ! Un atersadenn get Radio Bro Gwened